يا سلااام يا اخوانا السودان اتاريهو ضرب الطيارات الاسرائيلية في مصنع اليرموك

وانا في مصر مطلع هذا العام مع احبة اعزاء ركبنا تاكسي والسواق طلع من البدو بتوع سيناء وبعدين الراجل متجهم وساكت زي ابو الهول كده فما حبيت ازعج خلوته مع نفسو قلت احتمال يكون مبسوط في عالم تاني ...

فجاة كده سألني بلهجة بدوية وبنفس الصرامة :انتو من فين؟ من غير اي ظرافة وبصرة عشان ما يعمل فيها ابو الهول براهو قتليهو من السودان ..

رد: من السودان والله رجالة انتو اسرائيل اقدرتو عليها وحدكم...

قلت لنفسي الراجل ده شكلو داير يشغلها لي ما هو كمان مزاجو عالي خالص لكن احسن اجاريهو فجاوبتو :قدرنا على اسرائيل كيف؟؟ انتو مو الطيارات الأسرائيلية جات عندكو في السودان!! 

قاطعتو وقتليهو ايوه..قال: ايوووه جات تفجر عندكم ومرت على سينا وما في حد شافها وطارت فوق البحروخشت عندكو لكن انتو مسكتوها ...طبعا في اللحظة دي انا دارت في نفسي خيالات عديدة جدااا وقلت احتمال الجماعة عاملين للعالم مفاجاة وشوية تعتيم كده في السودان لكن قلت والمصحف الشريف ما اكسر خاطرو ابدا كمان ده عربي قح ما عندو مشكلة حسم هوية زي ما قال رئيسنا قبل كده يعني للضمان كده لو قتليهو كلامك غلط كان السواد صورة للبروفايلات بتاعتكم والتعازي لشخصي الضعيف وكان اشيل ذنب احبتي الذين معي والذين ارتضو بقيادتي الفاشلة حتما لو قلت لا للبدوي

فطوالي وحياتكم لبست قناع الناطق الرسمي للجيش العربي السوداني وبكل العنجهية والكبرياء رفعت راسي وقتليهو:كيف نخلي الطيارات تضرب بلدنا يرضيك الكلام ده الطيارات دي مرت من عندكو عشان انتو ما عندكم رادارات زينا نحن طوالي شفناها وضربنا فيها بالصواريخ ومسكنا الطيارين وهم دلوكتي اسرى عندنا بنعاملهم معاملة حسنة وحنبادل بيهم كل الاسرى الفلسطينيين في السجون الأسرائيلية..

والله يا اخوانا لو شفتو ابتسامة الراجل ده جميلة كيف بعد التجهم والصرة ديك والله انا لمن قلت حرام ياخ لكن على شنو خلي عربي واحد من بين الملايين ينوم وهو يشعر بالعزة ..الراجل حلف ما يشيل مننا قروش لكن طبعا انا بطل كبير فاصرت عليهو وكمان معاهو بقشيش وودعتو وودعت معاهو احلام الانتصار والعزة والوهم الكبيييييير وسلام يا لنبي .............